Vedtekter

Vedtekter for Forskerforbundet ved Høgskulen på Vestlandet

Vedtekne på årsmøte 13. mars 2018 – godkjent av AU/HS 30. januar 2019, med endringar vedtekne på årsmøte 30. april 2020, 21. mars 2024 og 19. mars 2026. 

§1. TILKNYTTING OG STATUS 

Forskerforbundet ved Høgskulen på Vestlandet (HVL) er Forskerforbundet sitt lokallag ved HVL. Forskerforbundet sine vedtekter gjeld for lokallaget, og dei lokale vedtektene utfyller desse.

§2. FØREMÅL
Lokallaget skal arbeide for medlemmene sine økonomiske og yrkesmessige interesser samt arbeidstilhøva deira ved HVL,  og  hjelper medlemmene i spørsmål knytt til lov- og avtaleverket. Lokallaget ved HVL opptrer på vegne av Forskerforbundet overfor HVL i tråd med lov- og avtaleverket. 

§3. MEDLEMMER
Alle medlemmer av Forskerforbundet som er tilsett ved HVL er medlemmer av lokallaget.

§4. ORGAN
Lokallaget (FF-HVL) sine organ er: 

• Årsmøte for lokallag og klubbar

• Lokallagsstyre

• Klubbstyra

§5. ÅRSMØTET
Årsmøte er lokallaget sitt øvste organ. Alle medlemmene i lokallaget har møte-, tale- og stemmerett. Lokallagstyret kallar inn til årsmøte, og sender ut dagsorden/sakspapir og innkomne forslag minst to veker før møtet. Innkomne forslag må være styret i hende innan fire veker før årsmøtet. 

Ordinært årsmøte vert gjennomført innan utgangen av mars. Ekstraordinært årsmøte vert halde når lokallagsstyret finn det naudsynt, eller når minst 1/3 av medlemmene ønskjer det. 

Årsmøtet vel hovudtillitsvalgt (HTV), leiar og nestleiar(ar). Ved HVL er verva som HTV og leiar samla i same funksjon/verv. Dei tre nestleiarane har eit særleg ansvar for campusane. Årsmøtet godkjenner rekneskap, budsjett, årsmelding og arbeidsprogram. 

Årsmøtet handsamar og uttaler seg om saker som vert lagt fram av lokallagsstyret eller av enkeltmedlemmer. Årsmøtet vel valkomité, som er sett saman av fire medlemmer, ein frå Sogndal/Førde, ein frå Haugesund/Stord og to frå Bergen. Ein av dei fire representantane skal vere ein teknisk/administrativt tilsett. Dei vert valde for to år. 

Valkomiteen sitt framlegg vert sendt til medlemmene seinast 1 veke før årsmøtet. På årsmøtet presenterer valkomiteen sine forslag.

§6. LOKALLAGSSTYRE
Lokallagsstyret består av:

• Leiar/HTV

• tre nestleiarar, éin frå kvar nærregion

• dei fire klubbleiarane

HTV/Leiar representerer medlemmene på verksemdsnivå i tråd med lov- og avtaleverk. Ein av nestleiarane fungerer som vara for leiar.

Lokallagsstyret står for den daglege drifta av lokallaget. Styret skal mellom anna kalle inn til lokallagsmøter og årsmøte, utarbeide årsmelding og arbeidsprogram, rekruttere nye medlemmer og oppnemne representantar til verv, utval og råd ved HVL. Det skal førast referat frå styremøta og medlemmene skal bli informert.

Lokallagsstyret sine medlemmer vert valde for to år. Lokallagsstyret skal så langt det er mogeleg settast saman på ein måte som sikrar brei representasjon på tvers av campusar, stillingsgrupper og kjønn. Nye verv trer i kraft frå 1. august same år.

Lokallagsstyret kan gjere vedtak når minst halvparten av styremedlemmene er til stades. Ved likt tal stemmer har leiar dobbelstemme.

HTV/leiar og dei tre nestleiarane har ansvaret for den daglege driftaav lokallaget og fungera som eit arbeidsutval/sekretariat. Dei har også eit særleg ansvar for å gjennomføre dei årlege lønnsforhandlingane.

Lokallagsstyret har eit særskild ansvar for å bidra til og fordele ressursar til campus-baserte tiltak og tiltak på tvers av klubbane ved HVL.

§7. KLUBBSTYRER

Lokallaget har klubbar på fakulteta og i fellesadministrasjonen; i alt fire klubbar. Namnet på klubbane er FLKI, FTMS, FHS og FA. Klubbane representerer Forskerforbundet på den einskilde eining . Alle medlemmer, uansett stillingsgruppe, er medlem i klubben på den eininga der dei er tilsette.

Klubbstyra skal så langt det er mogeleg vere breitt samansette, med representantar frå ulike campus, stillingsgrupper, kjønn, institutt eller fagområde. Klubbstyra skal ha medlemmer frå minst 50% av campusane der dei er representerte.

Arbeidsoppgåver klubbnivå

På klubbnivå har dei tillitsvalde mynde til å opptre på vegner av Forskerforbundet i samsvar med gjeldande lov- og avtaleverk. Klubbane skal ivareta medlemmene sine interesser på eininga og hjelpe medlemmene i enkle medlemssaker utan leiarinvolvering. Klubbleiar representerer Forskerforbundet på Informasjons- og drøftingsmøta (ID-møta) på eininga. Klubbane skal medverke ved utarbeiding av prioriteringslister i samband med lønnsforhandlingane. 

Årsmøte er det øvste organet i klubben. Klubbstyret kallar inn til årsmøte. Dei sender også ut dagsorden og sakspapir minst to veker før møtet. Ordinært årsmøte vert halde seinast to veker før årsmøtet i lokallagsstyret. Ekstraordinært årsmøte vert halde når klubbstyret finn det naudsynt, eller når minst 1/3 av medlemmene ønskjer det. 

Årsmøtet vel klubbstyre og valkomité og handsamar årsrapport og eventuelt arbeidsprogram. Klubbstyra konstituerer seg sjølve. Klubbstyret og valkomiteen sine medlemmer vert valde for to år. Nye verv trer i kraft frå 1. august same år.

Klubbleiar er klubbrepresentant i lokallagsstyret. Klubbleiar kan normalt ikkje ha vervet som leiar eller nestleiar i lokallagsstyret.

Årsmøtet handsamar og uttaler seg om saker som vert lagde fram av klubbstyret eller av enkeltmedlemmer. Årsmøtet avgjer valprosedyrar. Klubbleiar står for den daglege drifta av klubben. Klubbstyret skal mellom anna velje representantar til verv, utval og råd på einingsnivå, kalla inn til års-, og klubbmøter, utarbeida årsrapport og arbeidsprogram og rekruttere nye medlemmer. Det skal skrivast referat frå klubbstyremøta. Referata skal gjerast kjende for klubbmedlemmane. 

Klubbstyret kan gjere vedtak når minst halvparten av styremedlemmene er til stades. Ved likt tal stemmer har leiar dobbeltstemme. 

Klubbane har ikkje eigen økonomi. Utlegg til møter, kurs, servering og liknande må godkjennast av HTV/leiar på førehand. Klubbane kan ikkje pådra Forskerforbundet økonomiske forpliktingar. 

Alle fråsegner til sentrale myndigheiter, tenestemannsorganisasjonar eller hovudsamanslutningar skal gå gjennom lokallagsstyret. Lokallagstyret avgjer om saka skal fremjast.

§8. EKSKLUSJON
Berre hovudstyret i Forskerforbundet sentralt kan ekskludere medlemmer. 

§9. ENDRING I VEDTEKTENE 

Årsmøtet kan endre dei lokale vedtektene etter framlegg frå styret eller enkeltmedlemmer. Framlegg til endringar skal vera gjort kjende for medlemmene seinast to veker før årsmøtet. Eit framlegg om endringar krev 2/3 fleirtal av stemmene på årsmøtet for å bli vedteke.